الاثنين، 23 مايو 2011

بابا الباجي فدّ منكم



برشة عباد في عديد المدونات وفي الفايس بوك نازلين بموس ـ لام على بابا الباجي، وعملولو قائمة متاع تُهم تهزّ للفينقة، أول تهمة، يحبّ يلتفّ على الثورة ويكمبن مع حكومة الظلّ بزعامة المقاول كمال اللطيّف، والمصطلح هذا دبرهولنا مشكور سي فرحات الراجحي وقتلّي زبلحوه هاك ازوز فروخ وبزّ البيش وصبّلهم الصبّة وهو في بالو يحكي مع وليداتو وما في بالوش الي الشبيبة متاع توّة الرحمة لا ، ماكلين الفولْ ،إلّي تسمع تقولْ، وزيد هاو سي عمامو استعمل المصطلح هذايا بعد ما تضربت شعبيتو جرّة الخدمة في الحكومة وقدّم استقالتو بعد انجازاتو العظيمة في إفساد الشبيبة برفع الحجب على المواقع الاباحية ونداءاتو المتواصلة لرفع اليد على الزطلة وتوابعها استهلاكا ومشا قبل ما يحقق برامجو المختلفة في تقنين زواج المثليين.

من التهم الفرشك لبابا الباجي تأجيل الإنتخابات وطلع يكذب كي كلّ مرة يحلف بالأيمانات الي تقطع لكرومة كونو الانتخابات في 24 جويلية، توة مشكلة اليمين تاو يحلهالو المفتي بطيخ ( الوحيد مطفين عليه الضوّ شبيبة الفايسبوك)، أنا الحق مقلقتني برشة حكاية تأجيل الانتخابات عكس بنتي الي تغلق الثمنطاش سنة نهار 2 أوت وكانت متأزمة خاطرها ماهيش بش تنخّب نهار أربعة وعشرين جويلية أما ملّي سمعت البارح بحكاية 16 أكتوبر ولاّت تسأل على الأحزاب وبرامجهم ، وتكمبن هي وخوها ضدّ أمها إلّي عجبتها تصويرة الشابي ورئيستو وقررت تنتخبهم. ولد حومتي عبد الفتاح عجبتو فازة تأجيل الإنتخابات،و هكاكة ينجّم يكمّل يبني دارو في أرض ما يملكها حدّ كان الدولة، وهكاكة كي تجي الحكومة الجديدة تلقى كل شي تمّ وقاضي فاس ما ينجمشي يجيبلها تراكس.

من التهم إلّي ادخّل لغوانتنامو هي تدخيل الإرهابيين وعملان فيلم تقتل فيه شهيدي الجيش الوطني في الروحية ( والله قريتها في صفحات فايسبوكية)، وهو إلّي يشجع في القاعدة باش يعملولنا شويّة فوشيك باش لعباد تلقى فاش تتلهى وتلقى أمريكا مبرّر باش ترسكي ناقلاتها في موانينا وعلاش لا نكريولها قاعدة جويّة على حسب قانون 71 متاع تشجيع الاستثمارات الأجنبية وزيد وكان نتفاوضو معاها مليح تاو نعملوها في القصرين ولا قفصة ولا سليانة في نطاق التشجيع على الاستثمار في المناطق الداخليّة ووقتها تاو يدور الدولاب ونشغلو اليد العاملة في ميدان التنظيف والطبخ والخدمات الترحيبية جدّا.

من التهم الجنسية إليّ جات في القائمة لعمّي الباجي تشجيعو البوليسية على الإغتصاب بمختلف الوسائل المتاحة طبيعية كانت أو اصطناعية من ماتراك وغيرو لدعم هيبة الدولة، وفمّة اشكون خفف من التهمة هاذي وقال الراجل ما في بالوش أو ممكن من بشاعة المسألة ما حبّش يصدّقها على خاطر الوسائل الحديثة هاذيّ ما خدمش بيها وقتلي الي كان على راس الداخلية عام ككّح وهذاكة علاش طفاو الضوّ .

القائمة طويلة وعريضة وهاذوما نماذج باش يعطييونا فكرة على الراجل اش صايرلو.

بالله بابا الباجي اش ما زال في عمرو باش يلتف على الثورة؟ الراجل مكهب على التسعين ويا ذنوبي كان يعيش ل24 جويلية على الريتم الي يعيش بيه ها المدة، الراجل كان يقوم الصباح يشرب قهوتو ويقرا جريدتو ويسقي النوار ومن بعد يفطر ويرجع يرقد ، يقوم المغرب يعمل دورة خفيفة متاع ربيع ساعة ويرجع يشرب شربة الشعير متاعو ويتفرج على الجزيرة ويرقد، أمورو في العنبر ولنتريت مريقل ولولاد متهني عليهم،وتوة ملّي شدّ ها الحكومة ولى النوم ما عادش شابع بيه ويخدّم في خلايا مخّو اإلّي ضمرت من قلّة الإستعمال توة عشرين سنة، حتى العباد تبدلو عليه والتكمبين وقع تطويرو وكثرت عليه الأحزاب والجمعيات والهيئات والنقابات والإعتصامات والحرقان والشهريات وليبيا والإرهاب وفرانسا وأمريكا وبوتفليقة وقطر ورشيد عمار وكمّل عليه الراجحي بزريقة متاع صديد درعتلو خواطرو، أنا في بلاصتو نقدّم استقالتي ونرجع نكمّل ايامي الي ما زالوا تحت الياسمينة في الليل وهوكة ساعة ساعة نعمل انترفيو للوطنية ولا لنسمة متاع ذكريات على سي الحبيب وكفى الله المؤمنين شرّ القتال